for KING & COUNTRY
«for KING & COUNTRY» — гурт вядомы амаль кожнаму верніку. Іх сьпевы поўныя падбадзёрваньня і натхненьня, а мэлёдыі прыгожыя і запамінальныя.
Браты Джоэл і Люк Смолбоўны нарадзіліся ў Сіднэі, Аўстралія, але яшчэ дзецьмі разам з бацькамі яны эмігравалі ў ЗША ў Нэшвіл. Іх сям’я была шчыльна зьвязаная з музыкай: бацька працаваў музычным прамоўтэрам, а хлопцы выконвалі бэк-вакал і іншыя ролі другога пляна для сваёй сястры Рэбэкі Сэнт-Джэймс, хрысьціянскай сьпявачкі і аўтара сьпеваў, а таксама для розных гуртоў на канцэртах па ўсёй Амэрыцы. Неўзабаве пасьля таго, як Люк скончыў сярэднюю школу, браты паспрабавалі стварыць свой гурт «Joel & Luke» у 2007. Назву пазьней зьмянілі на «Austoville», перш чым спыніцца на сваёй цяперашняй назьве.
У 2008 годзе «Joel & Luke» выпусьцілі міні-альбом з шасьці сьпеваў пад назвай “A Tale of Two Towns”. Сьпеў “Love’s to Blame” быў напісаны ў суаўтарстве з Рэбэкай Сэнт-Джэймс.
У 2009 годзе Джоэл і Люк падпісалі кантракт з Warner Music Group з Бэнам Гловерам у якасьці прад’юсара. Яны зьмянілі сваю назву на «for KING & COUNTRY», паводле брытанскага баявога клічу.
«Мы хацелі мець назву гурта з больш глыбокім сэнсам. Мы былі ў студыі, запісвалі сьпеў, і ў Джоэла ўзьнікла ідэя назвы “All The King’s Men”. Наш прад’юсар пачуў нашу размову і прапанаваў “for KING & COUNTRY”. І ўсе мы адчулі дотык провіду ў той момант. «За караля і краіну» — гэта быў баявы кліч брытанскіх жаўнераў, гатовых аддаць жыцьцё за свайго караля і сваю краіну. І цяпер гэта стала нашай місіяй — аддаць сваё жыцьцё дзеля нашага Караля і нашай краіны».
Люк Смолбоўн
У 2011 годзе браты выпусьцілі міні-альбом «For King & Country: The EP». Сьпеў «Busted Heart (Hold On to Me)» быў выпушчаны ў якасьці сынгла і заняў 3-е месца ў чарце хрысьціянскіх сьпеваў Billboard. Хлопцы ахарактарызавалі «Busted Heart» як «сапраўды ўсеагульны крык чалавецтва пра нешта большае, чым мы самі…“ Сьпеў стаў самым папулярным сынглам 2011 года ў сваім жанры, падымаючыся ў Топ-10 цягам некалькіх тыдняў.
Новы альбом «Burn the Ships» быў выпушчаны 5 кастрычніка 2018 года. Джоэл і Люк назвалі яго самым сьпелым запісам, які яны зрабілі ў разуменьні таго, хто яны як дуэт, хто яны як мужчыны і, магчыма, у разуменьні жыцьця, таму што сталі крыху больш старэйшымі, чым былі ў мінулы раз. Два сьпевы былі напісаны на цяжкія тэмы (наркаманіі і суіцыду), а два — да іх жонак і пра іх (яны сьпяваюць у фінальным трэку «Pioneers» і зьяўляюцца ў кліпе). Альбом зьмяшчае дзесяць сьпеваў, і да яго запісана пяць кліпаў. «Burn the Ships» атрымаў Грэмі ў 2019 годзе, як і сынглы «God Only Knows» і «Joy».
У 2020 годзе пасьля адмены заплянаванага тура праз пандэмію каранавіруса гурт даваў канцэрты на адкрытым паветры ў стылі «драйв-ін», дзе наведвальнікі слухалі і глядзелі канцэрт са сваіх аўта. У кастрычніку 2020 года «for KING & COUNTRY» выпусьціў калядны паўнафарматны альбом «A Drummer Boy Christmas» у супрацоўніцтве з «Needtobreathe» і Гэбі Барэт. 7 студзеня 2022 года гурт выпусьціў рэклямны сынгл пад назвай «Unsung Hero», які распавядае пра маці Джоэла і Люка.
Пяты студыйны альбом гурта «What Are We Waiting For?» быў выпушчаны 11 сакавіка 2022 года. Альбом дэбютаваў на 1-м месцы ў чарце найлепшых хрысьціянскіх альбомаў Billboard і на 7-м месцы ў Billboard 200.
7 кастрычніка 2022 года гурт перавыдаў свой сьпеў «Love Me Like I Am» у якасьці сынгла з удзелам амэрыканскай сьпявачкі і акторкі Джардын Спаркс, якая стала пераможцай 6 сэзона American Idol. У дадатак да ўдзелу Спаркс, сьпеў уключаў у сябе пераробленыя інструмэнтальныя партыі. Сьпеў заняў 10-е месца ў чарце Hot Christian Songs. 16 чэрвеня 2023 года гурт выпусьціў сінгл «What Are We Waiting For?», які раней не ўваходзіў у альбом.
У адным з інтэрвію браты Смолбоўн апісалі сваю філасофію:
Сіла музыкі можа ўплываць на наш настрой, эмоцыі, наш дзень. Але калі вы злучаеце сілу музыкі з сэрцам, надзеяй і запалам Эвангельля… яна мае моц ня толькі зьмяніць чыйсьці дзень, але і паўплываць на жыцьцё. Вось чаму мы пішам музыку і сьпяваем — мы спадзяемся, што людзі будуць узрушаныя, падбадзёраныя і заахвочаныя жыць жыцьцём для Некага большага, чым яны самі.
На гэтае Раство мы падрыхтавалі для вас кавэр «Нябеснае воінства» на сьпеў «for KING & COUNTRY». Таксама на нашым сайце вы знойдзеце пераклады сьпеваў гэтага гурта — Нябеснае воінства, Амэн
